यस वर्षको दशैंमा जुम्लामा १६ करोड रुपैयाँभन्दा बढीको भेडा, खसी, र अन्य पशुको कारोबार भएको छ। चन्दननाथ नगरपालिकाको पशुपक्षी विकास शाखा प्रमुख वीरबहादुर रावलका अनुसार सदरमुकाम खलङ्गा बजार क्षेत्रबाट मात्र १६ करोड ३२ लाख ३१ हजार रुपैयाँको भेडा, खसी, बोका, र राँगाभैँसी बिक्री भएको छ।
जिल्लाका किसानले पालेका र बाहिरबाट ल्याइएका ७,९२८ भेडा र खसी बिक्री भएका छन्। यसमध्ये, १५ करोड २३ लाख २३ हजार रुपैयाँका भेडा, ७७ लाख ९२ हजार रुपैयाँका खसी, र ३१ लाख १६ हजार रुपैयाँका राँगा तथा भैँसी खरिदबिक्री भएका छन्। कुल कारोबारमा ४८७ खसी, ३ वटा राँगा, र ८२ वटा भैँसी रहेका छन्।
यहाँ स्थानीय भेडाको मूल्य १० हजारदेखि २८ हजार रुपैयाँसम्म रहेको छ भने औसत मूल्य १९ हजार रुपैयाँ थियो। जुम्ली खसीको मूल्य ८ हजारदेखि २४ हजारसम्म रहेकोमा औसतमा १६ हजार रुपैयाँमा बिक्री भएको हो। राँगा र भैँसीको औसत मूल्य ३८ हजार रुपैयाँ थियो, जसको अधिकतम मूल्य ५० हजार र न्यूनतम २६ हजार थियो।
विसं २०६८ देखि तिब्बती च्याङ्ग्रा ल्याउन छाडेपछि जुम्लामा स्थानीय भेडा र खसीबोका मात्र बिक्रीवितरण हुँदै आएको छ। पशु सेवा कार्यालयका अनुसार जुम्लामा हाल ८८ हजार भेडा छन्।
कनकासुन्दरी गाउँपालिकाको गोठीज्यूला, सिंजा गाउँपालिकाको नराकोट, हिमा गाउँपालिकाको जुगाड, बागबजार, तिला गाउँपालिकाको रारालिही, तातोपानी गाउँपालिकाको लिताकोट, पातारासी गाउँपालिकाको लासी बजार, र गुठीचौरी गाउँपालिकाको मणिसाँघुजस्ता साना बजारहरूमा समेत भेडा र खसीको कारोबार हुँदै आएको पशु सेवा कार्यालयले जनाएको छ।
प्रतिकृया