अब को को पर्नसक्छन पक्राऊ ? शेखर गोल्छालाई के कस्तो सजाय हुनसक्छ? [भिडियोसहित]

नेपाल प्रहरीको केन्द्रीय अनुसन्धान ब्युरो (CIB) ले वैशाख १० गते उद्योगी शेखर गोल्छालाई पक्राउ गरेसँगै नेपालको पूँजीबजारमा ठूलो चर्चा सुरु भएको छ। उनलाई धितोपत्र सम्बन्धी ऐन, २०६३ को दफा ९४, ९५, ९६ र ९८ अन्तर्गतको कसुरमा अनुसन्धानका लागि नियन्त्रणमा लिइएको हो। नेपाल धितोपत्र बोर्ड (SEBON) को प्रारम्भिक अनुसन्धान प्रतिवेदनका आधारमा गरिएको यो कारबाहीमा गोल्छा प्रत्यक्ष रूपमा सेयर कारोबारमा संलग्न नभए पनि अप्रत्यक्ष रूपमा प्रणालीगत हेरफेरमा जोडिएको आरोप छ। उनी गोल्छा अर्गनाइजेसनका नेतृत्वकर्ता तथा नेपाल उद्योग वाणिज्य महासंघका पूर्व अध्यक्ष हुन्, जसले गर्दा यो प्रकरण अझै संवेदनशील बनेको छ।

अनुसन्धानले देखाएअनुसार व्यवसायी दिपक भट्टले विभिन्न कम्पनीहरूबीच समन्वय गरेर डिबेन्चर कारोबारमार्फत कृत्रिम रूपमा मूल्य बढाउने काम गरेका थिए। आरोप अनुसार उनले आफ्नै प्रभावमा रहेका कम्पनीहरूबाट सस्तोमा डिबेन्चर खरिद गरी पुनः आफ्नै सम्बन्धित कम्पनीहरूलाई महँगोमा बिक्री गरेका थिए। एउटै IP address वा डिभाइसबाट विभिन्न कम्पनीहरूको TMS सञ्चालन गरी गरिएको कारोबारले बजारमा अस्वाभाविक उतारचढाव ल्याएको देखिएको छ। यस्ता कारोबारबाट उनले विभिन्न डिबेन्चरहरूमा करोडौं रुपैयाँ नाफा कमाएको अनुसन्धानमा उल्लेख छ।

Ads

गोल्छाको भूमिका भने प्रत्यक्षभन्दा बढी अप्रत्यक्ष देखिन्छ। उनले करिब ५२ करोड ५० लाख रुपैयाँ ब्रोकरमार्फत पठाएको र उक्त रकम दिपक भट्टले प्रयोग गरेको आशंका गरिएको छ। साथै उनी हिमालयन इन्स्योरेन्सका पूर्व अध्यक्ष भएकाले उक्त कम्पनीमार्फत भएका धेरै कारोबारमा उनको सम्बन्ध जोडिएको अनुसन्धानले देखाएको छ। यसै प्रकरणमा राज बहादुर शाह, ऋषिराज मोर लगायत अन्य व्यवसायीहरू पनि अनुसन्धानको दायरामा रहेका छन्।

कानुनी रूपमा हेर्दा, यदि आरोप प्रमाणित भए धितोपत्र ऐनअनुसार गोल्छालाई ५० हजारदेखि ३ लाख रुपैयाँसम्म जरिवाना, १ देखि २ वर्षसम्म कैद वा दुवै सजाय हुन सक्छ। साथै, कसैलाई नोक्सानी पुगेको प्रमाणित भए क्षतिपूर्ति पनि तिर्नुपर्ने हुन्छ। यद्यपि, प्रारम्भिक अनुसन्धानका लागि अदालतले छोटो समय मात्रै हिरासत अनुमति दिने भएकाले उनी धरौटीमा रिहा हुने सम्भावना पनि उच्च रहेको देखिन्छ।