एमालेका पोखरेल भन्छन्, “भीम रावललाई पहिलेनै निकालेको भए आमचुनावमा दुई सिट थपिन्थ्यो”
नेकपा (एमाले) ले पूर्वउपाध्यक्ष भीम रावललाई पार्टीबाट निष्कासन गरेपछि राजनीतिक वृत्तमा समर्थन र विरोधका आवाज सुनिएका छन्। पुस १० गतेको सचिवालय बैठकले रावललाई संगठित सदस्यबाट हटाउने निर्णय गरेको थियो, जसलाई पुस १९ को केन्द्रीय समितिले अनुमोदन गरेको छ।
एमाले पोलिटब्युरो सदस्य लक्ष्मीप्रसाद पोखरेलले रावलप्रति कडा आलोचना गरेका छन्। सोमबारको केन्द्रीय समिति बैठकमा उनले रावलको गतिविधिले पार्टीको प्रतिष्ठामा आँच पुर्याएको बताएका छन्। पोखरेलले रावललाई पहिले नै पार्टीबाट निकालेको भए आमचुनावमा एमालेले थप दुई सिट जित्ने दाबीसमेत गरे। पोखरेल २०७९ मंसिरको निर्वाचनमा दैलेख क्षेत्र नम्बर २ बाट नेपाली कांग्रेसका दिक्पालकुमार शाहीसँग १५३ मतान्तरले पराजित भएका थिए।
अध्यक्ष केपी शर्मा ओलीले पनि रावलमाथि टिप्पणी गर्दै, उनी पार्टीको नेतृत्वलाई धम्क्याएर फाइदा उठाउन खोजेको आरोप लगाए। ओलीले १०औँ महाधिवेशनपछि रावललाई पार्टीमा सम्झाउन धेरै प्रयास गरेको तर असफल भएको बताए।
अध्यक्ष ओलीले स्थायी कमिटी सदस्य बिन्दा पाण्डे र केन्द्रीय सदस्य उषाकिरण तिम्सेनाको निलम्बनबारे पनि धारणा व्यक्त गरे। उनले यो कारबाही नभई अस्थायी जिम्मेवारीमुक्त गर्ने प्रक्रिया भएको बताए। उनले पाण्डे र तिम्सेनाले आफ्नो कमजोरी महसुस गरे पुनर्विचार गर्न सकिने तर यथास्थितिमा उस्तै गतिविधि जारी राखे थप कारबाही हुन सक्ने संकेत गरे।
यसबीच, पार्टीबाट निष्कासित भीम रावल देश दौडाहमा व्यस्त छन्। उनी वैकल्पिक शक्ति निर्माण गर्ने योजनामा छन्, जसले नेपालको राजनीति र एमालेको भविष्यमा थप रोचकता थप्ने संकेत गरेको छ।
