संसद्ले पाँच वटा अध्यादेश बहुमतले पारित गर्यो

प्रतिनिधिसभाले भूमिसम्बन्धी अध्यादेशबाहेक पाँच वटा अध्यादेश बहुमतले स्वीकृत गरेको छ। स्वीकृत अध्यादेशहरूमा सुशासन प्रवर्द्धन, आर्थिक कार्यविधि तथा वित्तीय उत्तरदायित्व (पहिलो संशोधन), निजीकरण (पहिलो संशोधन), आर्थिक तथा व्यावसायिक वातावरण सुधार, र सहकारीसम्बन्धी ऐन संशोधन अध्यादेश रहेका छन्।

अब सरकारले संसदमा प्रतिस्थापन विधेयक पेस गरी चैत १८ भित्र पारित गराउनुपर्ने हुन्छ।

नेकपा एमाले, कांग्रेस, जसपा नेपाल, र लोसपाले समर्थन गरे पनि माओवादी केन्द्र, रास्वपा, राप्रपा, र नेमकिपा विपक्षमा उभिएका छन्। जसपा नेपालले भूमिसम्बन्धी अध्यादेशको विरोध गर्दै आएको छ, जसका कारण सरकार यसबारे अन्योलमा छ।

राष्ट्रियसभाबाट पनि स्वीकृति लिनुपर्ने भएकाले बिहीबार दिउँसो १:१५ मा बैठक बोलाइएको छ। अध्यादेश सदनमा पेस भएको ६० दिनभित्र प्रतिस्थापन विधेयक पारित नभए स्वतः निष्क्रिय हुनेछ।