नेप्सेले विद्यार्थीहरुका लागि निःशुल्क ‘भिजिट नेप्से’ कार्यक्रम आयोजना गर्दै, कसरी हुने सहभागी ?

नेपाल स्टक एक्सचेन्ज (नेप्से) ले पूँजी बजार सम्बन्धी सचेतना अभिवृद्धि गर्ने उद्देश्यले ‘भिजिट नेप्से कार्यक्रम’ सञ्चालन गर्ने भएको छ। नेप्सेले जारी गरेको सूचनाअनुसार, यस कार्यक्रममार्फत स्कुल, कलेज, विश्वविद्यालयका विद्यार्थीलाई नेप्से तथा पूँजी बजारसँग सम्बन्धित निकाय र प्रणालीबारे जानकारी प्रदान गरिनेछ। कार्यक्रम पूर्ण रूपमा निःशुल्क हुनेछ।

विशेषगरी, स्नातक र स्नातकोत्तर तहका विद्यार्थीहरूलाई लक्षित गर्दै आयोजना हुने यस कार्यक्रममा विद्यार्थीहरूले नेप्से अवलोकन भ्रमण र अन्तरक्रियामा सहभागी भई पूँजी बजारको प्रणाली बुझ्ने अवसर पाउनेछन्। नेप्सेको अपेक्षा अनुसार, कार्यक्रमले दोस्रो बजार सम्बन्धी जानकारी आम सर्वसाधारणसम्म पुर्‍याएर कारोबारमा सहयोग पुर्‍याउने तथा चेतना अभिवृद्धि गर्नेछ।

कार्यक्रममा सहभागी हुन इच्छुक क्याम्पसहरूले आफ्नो नाम, ठेगाना, सम्पर्क व्यक्ति र सम्पर्क नम्बर सहित [email protected] मा इमेल पठाई, सूचना प्रकाशित भएको १५ दिनभित्र नाम दर्ता गराउनुपर्नेछ।