कर्णाली डेभलपमेन्ट बैंकका ग्राहकले हप्तामा एकपटक मात्रै निक्षेप भुक्तानी पाउने भएका छन्। नेपाल राष्ट्र बैंकले बैंकलाई समस्याग्रस्त घोषणा गर्दै आफ्नो नियन्त्रणमा लिएर व्यवस्थापन समूह गठन गरेको थियो। समूहका संयोजक टीकाराम खतिवडाका अनुसार बैंकमा तरलताको अभावका कारण निक्षेप भुक्तानी सीमित गरिएको हो। वर्तमान व्यवस्थापनले विशेषगरी बिरामी, वृद्ध र बालबालिकालाई प्राथमिकतामा राखी प्रतिशाखा दैनिक ५० जनालाई अधिकतम २५ हजार रुपैयाँसम्म भुक्तानीको व्यवस्था गरेको छ।
कर्णाली डेभलपमेन्ट बैंकले राष्ट्र बैंकद्वारा तोकिएको न्यूनतम पुँजीकोष अनुपात कायम गर्न नसक्नु, कमजोर संस्थागत सुशासन, आर्थिक हिनामिनाको आशंका, र कमजोर तरलता अवस्थाका कारण निक्षेप दायित्व पूरा गर्न असमर्थ भएपछि समस्याग्रस्त घोषित भएको हो। यसअघि, बैंकको निष्क्रिय कर्जा अनुपात ४०.८५ प्रतिशत पुगेको र वित्तीय अपचलनका कारण ग्राहकको बचत जोखिममा पर्ने देखिएको थियो। यसलाई ध्यानमा राख्दै राष्ट्र बैंकले मंसिर ११ देखि शीघ्र सुधारात्मक कारबाही थाल्दै बैंक तथा वित्तीय संस्थाको नियमन विभागका उप-निर्देशक टीकाराम खतिवडाको संयोजकत्वमा तीन सदस्यीय व्यवस्थापन समूह गठन गरेको हो।
उक्त समूहलाई बचतकर्ताको हित संरक्षण, ऋण असुली, र वित्तीय अपचलनमा कानुनी कारबाही अघि बढाउने जिम्मेवारी दिइएको छ। ग्राहकलाई साप्ताहिक सीमित भुक्तानी व्यवस्था गरिएको र बचत सुरक्षाको प्रत्याभूति गराउँदै बैंकिङ प्रणालीप्रति विश्वास कायम गर्न प्रयास भइरहेको राष्ट्र बैंकले जनाएको छ।
![सेबोन अध्यक्ष भट्टले सार्वजनिक गरे पूँजी बजार विकासका १५ प्रमुख एजेन्डा [भिडियोसहित]](https://bajarkochirfar.com/wp-content/uploads/2026/07/89bc274a-9daf-4136-875c-cec0d72f8ee8-150x150.png)
प्रतिकृया