हर्क साम्पाङको आरोप: ‘जेन–जी’ आन्दोलन र सहकारी ठगीबाट बच्न वरीयता मिचेर नियुक्ति गरियो

श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले प्रधानन्यायाधीश नियुक्ति प्रक्रियाप्रति गम्भीर असन्तुष्टि जनाएका छन्। उनले संसद् छलेर संवैधानिक परिषद् सम्बन्धी अध्यादेश ल्याइएको र वरीयता क्रम मिचेर नियुक्ति गरिएको भन्दै सरकारको कदमको विरोध गरेका हुन्।

शुक्रबार जारी विज्ञप्तिमा साम्पाङले राष्ट्र प्रमुखमाथि दबाब सिर्जना गरेर अध्यादेश जारी गराउनु विधिको शासनविपरीत भएको बताएका छन्। उनले वरीयताको चौथो क्रममा रहेका व्यक्तिलाई प्रधानन्यायाधीश नियुक्त गर्नु सरकारको “ठूलो गल्ती” भएको टिप्पणी गरेका छन्। “सारा नेपालीलाई थिति र सुशासनको आश्वासन दिएर आएको दलले विधि मिचेर गरेको यो निर्णयमा राजनीतिक तथा कानुनी स्वार्थ राखेको हुन सक्छ,” विज्ञप्तिमा उल्लेख छ।

साम्पाङले सहकारी ठगी प्रकरण तथा भदौ २३–२४ मा भएको ‘जेन–जी आन्दोलन’ जस्ता विषयमा आफ्नो पक्षमा निर्णय गराउने उद्देश्यले नियुक्ति गरिएको हुन सक्ने आशंका पनि व्यक्त गरेका छन्। उनले आफ्नै पार्टीबाट प्रतिनिधित्व गर्ने उपसभामुखले समेत वरीयता मिचिएको निर्णयमा हस्ताक्षर गरेकोप्रति दुःख व्यक्त गरेका छन्। “हाम्रै पार्टीबाट जानु भएको उपसभामुखले समेत वरीयताको क्रम उल्लंघन गरेर गरिएको निर्णयमा हस्ताक्षर गर्नु खेदपूर्ण छ,” उनले भनेका छन्।