गगन थापा भन्छन्, “लौ न प्रधानमन्त्री बनिदिनुपर्यो भनेर प्रचण्डले हप्तामा एक पटक कांग्रेसलाई खबर पठाउनुहुन्छ”
नेपाली कांग्रेसका महामन्त्री गगन थापाले नेकपा (माओवादी केन्द्र) का अध्यक्ष पुष्पकमल दाहाल (प्रचण्ड) ले अझै पनि हप्तामा एक पटक कांग्रेसलाई सन्देश पठाउँदै प्रधानमन्त्री बनिदिन प्रस्ताव राख्ने गरेको बताएका छन्।
उनले कीर्तिपुरमा आयोजित कांग्रेसको चुनावी सभामा बोल्दै कांग्रेस सरकार परिवर्तन गर्ने पक्षमा नरहेको स्पष्ट पारे। असार १७ मा एमालेसँग भएको सहमतिअनुसार कांग्रेसले सरकारलाई स्थिरता दिने निर्णयमा अडिग रहेको उनले उल्लेख गरे। महामन्त्री थापाले कांग्रेसले बेरोजगारी, गरिबी र विधिको शासन स्थापित गर्ने पक्षमा संघर्ष गरिरहेको बताए।
साथै, ठगी, चटकेबाजी र गैरकानुनी गतिविधिहरूविरुद्ध कांग्रेसको कठोर अडान रहेको पनि स्पष्ट पारे। कांग्रेस आफ्नै पार्टीभित्र लुकेका गलत तत्वहरूलाई पनि कानुनी कठघरामा ल्याउने जिम्मेवारीबाट पछि नहट्ने उनको भनाइ थियो।
उपनिर्वाचनको मौन अवधिमा आचारसंहिताको पालना गर्न सबै पक्षलाई आग्रह गर्दै उनले जनताको विश्वास जित्न र समस्या समाधान गर्न कांग्रेस प्रतिबद्ध रहेको दोहोर्याए।
