चापागाउँदोबाटोको भाटभटेनीलाई १० हजार रुपैयाँ जरिवाना तोकिएको छ। संयुक्त जिल्ला बजार अनुगमन समिति ललितपुरले भाटभटेनीको उक्त शाखालाई जरिवाना तोकेको हो। ललितपुर जिल्लाका सहायक प्रमुख जिल्ला अधिकारी गीता घिमिरेको नेतृत्वमा खटिएको संयुक्त अनुगमन समितिले भाटभटेनीलाई सोमबार १० हजार रुपैयाँ जरिवाना गरेको हो।
म्याद उल्लेख नगरिएको इम्लीको आचार भेटिएपछि एउटा प्याकेज गुणस्तर जाँचका लागि पठाएर बाँकी अचार जफत गरिएको छ। अहिले सचेतनाका लागि उपभोक्ता संरक्षण ऐन, २०७५ को दफा ३९ उपदफा २ (क) बमोजिम अनुचित व्यापारिक क्रियाकलाप गरेकाले सोही ऐनको दफा ३८ (ङ) बमोजिमको कसुरमा दफा ३९ बमोजिम १० हजार मात्रै जरिवाना तोकिएको घिमिरेले जानकारी दिइन्।
भाटभटेनीले यस विषयमा सुधार गर्न प्रतिबद्धता जनाएको छ भने यस्ता गतिविधि दोहोरिए थप कडा कारबाही गरिने चेतावनी समितिले दिएको छ।
प्रतिकृया