बन्दीपुर केवलकार एण्ड टुरिजम कम्पनी लिमिटेड र स्वस्तिक लघुवित्त वित्तीय संस्था लिमिटेडको आईपीओमा वैदेशिक रोजगारीमा रहेका नेपालीहरूले आवेदन दिन सक्ने आज (साउन ९ गते) अन्तिम दिन हो।
बन्दीपुर केवलकारले साउन ६ गतेदेखि वैदेशिक रोजगारीमा रहेका नेपाली र आयोजना प्रभावित स्थानीयवासीका लागि आईपीओ निष्काशन गरेको हो। कम्पनीले प्रतिकित्ता १०० रुपैयाँका दरले कुल ५८ लाख ६० हजार कित्ता सेयरमध्ये वैदेशिक रोजगारीमा रहेका नेपालीका लागि ५ लाख २९ हजार ४०० कित्ता र आयोजना प्रभावितका लागि ५ लाख ६६ हजार कित्ता निष्काशन गरिरहेको छ। वैदेशिक रोजगारीका लागि आज साँझ ५ बजेसम्म आवेदन दिन सकिनेछ भने आयोजना प्रभावितका लागि साउन २० गतेसम्म आवेदन दिने समय छ। यसमा न्यूनतम १० कित्ता र अधिकतम २० हजार कित्तासम्म आवेदन दिन सकिन्छ।
स्वस्तिक लघुवित्तले असार २७ गतेदेखि वैदेशिक रोजगारीमा रहेका नेपालीहरूलाई लक्षित गरी पहिलो चरणको आईपीओ जारी गरेको हो। कम्पनीले प्रतिकित्ता १०० रुपैयाँमा जम्मा २ लाख ३१ हजार कित्ता सेयर निष्काशन गर्न अनुमति पाएकोमा हाल २३ हजार १०० कित्ता वैदेशिक रोजगारीमा रहेकाहरूका लागि जारी गरिएको छ। यसमा पनि न्यूनतम १० कित्ता र अधिकतम ५ हजार कित्तासम्म आवेदन गर्न सकिन्छ।
नेपाल धितोपत्र बोर्डले हालै मात्र वैदेशिक रोजगारीमा रहेका नेपालीका लागि हुने आईपीओको आवेदन समय १५ दिनबाट घटाएर ४ दिन कायम गरेपछि बन्दीपुर केवलकारको आवेदन म्याद छोटिएको हो। दुवै कम्पनीको आईपीओमा मागभन्दा बढी आवेदन परिसकेकाले आज साँझ ५ बजेपछि आवेदन प्रक्रिया बन्द हुने भएको छ। इच्छुक व्यक्तिहरूले मेरो सेयर एपमार्फत वा सी–आस्बा सदस्य बैंक तथा वित्तीय संस्थाका शाखाबाट अनलाइन आवेदन दिन सक्नेछन्।
प्रतिकृया