दक्षिण कोरियाका राष्ट्रपति युन सुक-योलले आफूले कानुनअनुसार ‘मार्सल ल’ लागू गरेको बताउँदै आफ्नाे निर्णयको बचाउ गरेका छन्। बिहीबार टेलिभिजन सम्बोधनमार्फत उनले आफूले राजीनामा नदिने र अन्तिमसम्म महाभियोगविरुद्ध लड्ने बताएका छन् । लोकतन्त्रको अन्त्य हुन नदिन र संसद्मा प्रतिपक्षको अधिनायकवादको विरोध गर्न मार्सल ल लगाउने निर्णय गरेको उनको भनाइ छ ।‘ममाथि छानबिन होस् वा महाभियोग लगाइयोस् । म निष्पक्षरूपमा सामना गर्नेछु । अन्तिम सम्म लडिरहनेछु,’उनले भनेका छन् ।
गत हप्ता मंगलबार साँझ उनले देशमा अचानक ‘मार्सल ल’ लागू गरेको घोषणा गरेका थिए। तर चर्को विरोधका कारण त्यसको ६ घण्टाभित्रै निर्णय फिर्ता लिन बाध्य भएका थिए। यो घटनापछि देशभर उनको व्यापक आलोचना भइरहेको छ भने उनलाई महाभियोग लगाउनुपर्ने आवाज पनि उठिरहेको छ।जसका कारण दक्षिण कोरियामा उनको व्यापक विरोध र अनुसन्धान भइरहेको छ। यसैबीच, बुधबार प्रहरीले राष्ट्रपतिको कार्यालय र प्रहरी प्रधान कार्यालयमा छापा मारेको छ।
प्रतिकृया