अर्थ मन्त्रालयले आगामी बजेटबारे गृह मन्त्रालयसँग गर्यो छलफल

नयाँ बजेट निर्माणबारे अर्थ मन्त्रालय र गृह मन्त्रालयबीच छलफल भएको छ।

उक्त छलफलमा उपप्रधानमन्त्री तथा अर्थमन्त्री विष्णुप्रसाद पौडेलले आगामी आर्थिक वर्ष २०८२/८३ को बजेट अर्थ मन्त्रालय, सम्बन्धित मन्त्रालयहरू र राष्ट्रिय योजना आयोगसँग समन्वय गरी ल्याइने बताए।

Ads

उनका अनुसार तीन पक्षीय समन्वयबाट तयार गरिएको बजेटले अपनत्वको भावना वृद्धि गर्ने र कार्यान्वयनलाई सहज बनाउने छ। साथै, परामर्श र छलफलका आधारमा बजेट ल्याउँदा बुझाइमा एकरूपता आउने तथा देखिएका चुनौतीहरू समाधान गर्दै अघि बढ्न सकिने उनको धारणा छ।

अर्थमन्त्री पौडेलले नीति, कार्यक्रम र बजेटबीच समन्वय आवश्यक रहेको उल्लेख गर्दै, उपलब्ध साधनस्रोतको यथोचित व्यवस्थापनमा ध्यान दिन सम्बन्धित निकायहरूलाई आग्रह गरे।

छलफलमा गृहमन्त्री रमेश लेखक, राष्ट्रिय योजना आयोगका उपाध्यक्ष, अर्थ सचिव, गृह सचिव, नेपाल प्रहरी र सशस्त्र प्रहरीका प्रमुख लगायतका अधिकारीहरू सहभागी थिए।