मुलुकको बाह्य क्षेत्र मजबुत: मुलुकको शोधनान्तर स्थिति र चालु खाता बचतमा मुलुकको आन्तरिक अर्थतन्त्र केही कमजोर देखिए पनि बाह्य क्षेत्र मजबुत देखिएको छ।

नेपाल राष्ट्र बैंकले सार्वजनिक गरेको तथ्यांकअनुसार चालु आर्थिक वर्ष २०८१/८२ को पहिलो सात महिनामा शोधनान्तर स्थिति २ खर्ब ८४ अर्ब ४१ करोड रुपैयाँ बचतमा रहेको छ।

अघिल्लो वर्षको सोही अवधिमा शोधनान्तर स्थिति २ खर्ब ९७ अर्ब ७२ करोड रुपैयाँ बचतमा रहेको थियो। अमेरिकी डलरमा गणना गर्दा, अघिल्लो वर्ष यो २ अर्ब २४ करोड डलर रहेकोमा समीक्षा अवधिमा २ अर्ब ११ करोड डलरमा सीमित भएको छ।

चालु खाता पनि बचतमा यस अवधिमा चालु खाता १ खर्ब ६६ अर्ब ८० करोड रुपैयाँ बचतमा देखिएको छ। अघिल्लो वर्ष सोही अवधिमा यो १ खर्ब ६२ अर्ब ५२ करोड रुपैयाँ थियो।

अमेरिकी डलरमा चालु खाता बचत अघिल्लो वर्ष १ अर्ब २२ करोड डलर रहेकोमा यस वर्ष १ अर्ब २४ करोड डलर पुगेको छ। शोधनान्तर स्थिति र चालु खाता दुवै बचतमा रहेकाले मुलुकको बाह्य क्षेत्र मजबुत देखिएको छ।