नबिल बैंकले युरोमनी ट्रान्ज्याक्सन बैंकिङ अवार्ड, २०२५ अन्तर्गत नेपालको ‘बेस्ट ट्रान्ज्याक्सन बैंक अवार्ड’ प्राप्त गरेको छ। बैंकलाई यो अवार्ड ट्रान्ज्याक्सन बैंकिङ क्षेत्रमा अन्तर्राष्ट्रिय स्तरको प्रविधिमैत्री र ग्राहककेन्द्रित सेवा प्रवाह गरेको मान्यता स्वरूप प्रदान गरिएको हो।
बैंकले व्यक्तिगत, संस्थागत र एसएमई ग्राहकका लागि प्रभावकारी डिजिटल भुक्तानी सेवा तथा सुविधाहरू उपलब्ध गराएको कारण यस सम्मान पाएको जनाइएको छ। प्रविधिको अधिकतम उपयोग गर्दै सेवाहरू सरल, सुरक्षित र छरितो बनाएकोले ग्राहकका दैनिकी व्यवसाय सञ्चालनमा सहजता पुगेको छ।
बैंकका प्रमुख कार्यकारी अधिकृत मनोजकुमार ज्ञवालीले यो सम्मान नबिल बैंकको निरन्तर मेहनत, नवप्रवर्तन र ग्राहक विश्वासको परिणाम भएको बताए। उनले सबै ग्राहक र कर्मचारीप्रति आभार व्यक्त गरे।
विश्वभर बैंकिङ तथा वित्तीय क्षेत्रको मूल्यांकन गर्ने युरोमनी अवार्ड विश्वसनीय र सम्मानित मानिन्छ। यसले सेवा उत्कृष्टता, नवप्रवर्तन, रणनीतिक स्पष्टता र ग्राहक अनुभवमा अग्रणी संस्थाहरूलाई सम्मानित गर्दछ।
सन् १९९२ मा स्थापना गरिएको यो अवार्ड विश्व बैंकिङ क्षेत्रमा सुरु भएको पहिलो अवार्ड हो र हाल विश्वका १०० देशमा सञ्चालन भइरहेको छ। यसले बैंकको गुणस्तरीय सेवा, सृजनात्मकता र ग्राहकप्रतिको विशेषज्ञतालाई सम्मान दिन्छ।
प्रतिकृया