बजेट कार्यान्वयनका अवरोध हटाउँदै सरकार अघि बढ्छ: अर्थमन्त्री पौडेल

उपप्रधानमन्त्री तथा अर्थमन्त्री विष्णुप्रसाद पौडेलले आगामी आर्थिक वर्ष २०८२/८३ को बजेट विनियोजन विधेयकका सिद्धान्त र प्राथमिकताका आधारमै निर्माण गरिने स्पष्ट पारेका छन्। राष्ट्रियसभामा बजेट सिद्धान्त र प्राथमिकता (कर प्रस्तावबाहेक) माथिको छलफलमा उठेका प्रश्नहरूको जवाफ दिँदै उनले बजेट कार्यान्वयनमा देखिएका बाधा हटाएर सरकार अघि बढ्ने बताए।

उनका अनुसार बजेट व्यवहारिक र वस्तुनिष्ठ हुनेछ, र कार्यान्वयनबाट मुलुक र जनताले प्रत्यक्ष प्रतिफल पाउने छन्। पौडेलले छलफलबाट आएका सुझावहरू बजेट निर्माणमा समावेश गरिने प्रतिबद्धता पनि व्यक्त गरे।

उनले वर्तमान विकासको ढाँचा, गति र संस्कृतिमा परिवर्तन आवश्यक रहेको भन्दै त्यसैको अनुभूतिमा आधारित भएर सिद्धान्त र प्राथमिकता तय गरिएको जानकारी दिए। नीति तथा कार्यक्रमसँग यसको समन्वय गरिएको समेत उनले उल्लेख गरे।

साथै, प्रस्तुत सिद्धान्त र प्राथमिकताले सन्तुलित र समावेशी विकास, रोजगारी, स्वरोजगारी तथा गरिबी निवारणलाई प्राथमिकता दिएको समेत अर्थमन्त्री पौडेलले स्पष्ट पारे।