नेकपा माओवादी केन्द्रले २०८४ सालको चुनाव पनि एक्लै लड्ने तयारी गर्ने निर्णय गरेको छ। मंसिर १६ गते सम्पन्न स्थानीय तह उपनिर्वाचनबाट उत्साहित हुँदै पार्टीले यस्तो योजना बनाएको हो। आज बिहान पार्टी अध्यक्ष पुष्पकमल दाहाल ‘प्रचण्ड’को निवास खुमलटारमा बसेको पदाधिकारी बैठकले उपनिर्वाचनको नतिजालाई आधार मानेर आगामी निर्वाचनको तयारी एक्लै गर्ने निष्कर्ष निकालेको हो।
बैठकपछि उपाध्यक्ष एवम् प्रवक्ता अग्नि सापकोटाले उपनिर्वाचनमा माओवादीले ४४ मध्ये ११ स्थान जितेर दोस्रो स्थान हासिल गरेको सफलता जनताले माओवादीको एक्लो लडाइँलाई अनुमोदन गरेको संकेत भएको बताए। सापकोटाका अनुसार, ‘बीचमा केही समय अलमल भए पनि अब जनता र माओवादीको मन एक ठाउँमा भएको अनुभूति भएको छ।’
सापकोटाले २०८४ सालको निर्वाचनका लागि माओवादीले प्रत्यक्ष निर्वाचित राष्ट्रपति, पूर्ण समानुपातिक निर्वाचन प्रणाली, र सांसदहरू मन्त्री नबन्ने गरी संविधान संशोधन गर्ने एजेन्डा अघि सार्ने बताए। बैठकले पार्टीको सुशासन अभियानलाई थप जनस्तरसम्म पुर्याउने, पालिका अधिवेशनहरूलाई प्राथमिकता दिने र खबरदारी सभाहरूमा नेतृत्व केन्द्रित गर्ने निर्णय समेत गरेको छ।
यद्यपि, कीर्तिपुर नगरपालिकाको मेयर पदको उपनिर्वाचनमा माओवादी उम्मेदवार दोस्रो भए पनि त्यसलाई सकारात्मक संकेतका रूपमा लिएर पार्टीले उत्साह व्यक्त गरेको छ। अब पार्टीको सम्पूर्ण ध्यान आगामी चुनाव जित्न केन्द्रित हुनेछ।
प्रतिकृया