चिनी प्रतिकेजी १०७.५० रुपैयाँ भन्दा बढी लिन नपाइने

सरकारले भारतबाट खरिद गरिएको चिनी बिक्रीका लागि बजारमा पठाउन सुरु गरेको छ। भारतबाट खरिद गरिएको ८,१०० मेट्रिक टन चिनीलाई बजारमा वितरण गरिएको वाणिज्य, आपूर्ति तथा उपभोक्ता संरक्षण विभागले जानकारी दिएको छ।

चिनीको प्रतिकेजी मूल्य १०७.५० रुपैयाँ तोकिएको छ, र यसभन्दा बढी मूल्य लिन नपाइने स्पष्ट गरिएको छ।

Ads

Ads

Ads

भारतबाट चिनी ल्याउन सात वटा व्यवसायी कम्पनीहरूको चयन गरिएको थियो, जसमा तीन कम्पनीले २,७०० मेट्रिक टन चिनी ल्याएका छन्। चार कम्पनीले ल्याउन नसकेको कारण सम्झौतासमेत खारेज गरिएको विभागले जनाएको छ।

कात्तिक २०८० महिनामा भारत सरकारले नेपाललाई २५,००० मेट्रिक टन चिनी उपलब्ध गराउने सहमति गरेको थियो। यसमा खाद्य व्यवस्था तथा व्यापार कम्पनी र साल्ट ट्रेडिङ कर्पोरेशनले ६,००० मेट्रिक टन चिनी खरिद गर्ने योजना बनाएका थिए।

चिनीको मूल्य निर्धारण र बिक्री आपूर्ति व्यवस्थापनका लागि सहुलियत मूल्य पसलमा पनि चिनी राखिने व्यवस्था गरिएको छ। आयात गरिएको चिनीको भण्डारण र बिक्रीको अवस्थाबारे साप्ताहिक रूपमा विभागमा जानकारी गराउने व्यवस्था छ।

Ads

सरकारी खाद्य व्यवस्था तथा व्यापार कम्पनी र साल्ट ट्रेडिङ कर्पोरेशनले ५० प्रतिशत भन्सार छुटको १५,००० मेट्रिक टन चिनी आयातका लागि प्रक्रिया सुरु गरेका छन्। साल्टले दशैंभित्रै चिनी ल्याउने प्रक्रिया अघि बढाएको जनाएको छ, जबकि खाद्य कम्पनीले तिहारसम्म चिनी ल्याउने तयारी गरेको छ।