हकप्रद र लाभांश प्रस्ताव पारित गर्न युनाइटेड मोदी हाइड्रोपावरले बोलायो साधारणसभा, बुक क्लोज कहिले ?

युनाइटेड मोदी हाइड्रोपावरले आफ्नो १२औँ वार्षिक साधारणसभा आह्वान गरेको छ। कम्पनी सञ्चालक समितिको निर्णयअनुसार सभा वैशाख २७ गते, बिहान ११ बजे, काठमाडौंको कालीमाटीस्थित कालीमाटी ब्यांक्वेटमा आयोजना हुनेछ।

सभाले आर्थिक वर्ष २०८१/८२ का लागि प्रस्तावित चुक्तापुँजी १ अर्ब २३ करोड ५ लाख रुपैयाँमा ७.३६८४२ प्रतिशत लाभांश अनुमोदन गर्नेछ। यसमा ७ प्रतिशत बोनस सेयर र कर प्रयोजनार्थ ०.३६८४२ प्रतिशत नगद लाभांश समावेश छन्।

Ads

Ads

Ads

लाभांश वितरणपछि, हकप्रद सेयर जारी गर्न नियमनकारी निकायबाट स्वीकृति लिन कम्पनी सञ्चालक समितिलाई अख्तियारी दिने विशेष प्रस्ताव पनि सभाले पारित गर्नेछ। यसका साथै, कम्पनीले होल्डिङ कम्पनीको रुपमा अन्य कम्पनीमा लगानी गर्न नाम परिवर्तन र प्रबन्धपत्र तथा नियमावलीमा संशोधन गर्ने प्रस्ताव अनुमोदन गर्नेछ।

सभाले प्रबन्धपत्र र नियमावली संशोधनमा नियमनकारी निकायबाट प्राप्त निर्देशन तथा सुझाव समेट्ने अधिकार सञ्चालक समितिलाई दिने विशेष प्रस्ताव पनि पारित गर्नेछ। साथै, लगानीयोग्य क्षेत्र पहिचान गरी लगानी गर्न सञ्चालक समितिलाई अख्तियारी दिने प्रस्ताव स्वीकृत हुनेछ।

सभाले दुई जना सञ्चालकको निर्वाचन, गत आर्थिक वर्षको वार्षिक प्रतिवेदन र लेखापरीक्षकको प्रतिवेदन स्वीकृति, साथै चालु आर्थिक वर्षका लागि लेखापरीक्षकको नियुक्ति र पारिश्रमिक निर्धारण सम्बन्धी प्रस्ताव पनि पारित गर्नेछ।लाभांश वितरण र सभा प्रयोजनार्थ कम्पनीले वैशाख ४ गते बुक क्लोज गर्ने निर्णय गरेको छ जसअनुसार वैशाख ४ गतेसम्म कायम सेयरधनीमात्र लाभांश पाउन योग्य हुनेछन्।