ट्रम्पको करले भारतीय सेयर बजार क्र्यास, लगानीकर्ताको २० लाख करोड डुब्यो

अमेरिकी पूर्वराष्ट्रपति डोनाल्ड ट्रम्पले घोषणा गरेको नयाँ ट्यारिफको प्रभावले सोमबार बिहान भारतीय सेयर बजारमा ठूलो गिरावट देखिएको छ। बजार खुलेसँगै सेन्सेक्समा भारी करेक्सन देखिँदा लगानीकर्ताको करिब २०.१६ लाख करोड रुपैयाँ बराबरको सम्पत्ति डुबेको हो।

बिहानको कारोबारमै ३० ओटा कम्पनी समेटिएको बीएसई सेन्सेक्स ३,९३९.६८ अंकले घटेर ७१,४२५.०१ मा झरेको छ, जुन ५.२२ प्रतिशतको गिरावट हो। बजारमा देखिएको व्यापक गिरावटसँगै बीएसईमा सूचीकृत सबै कम्पनीहरूको शेयर मूल्य घटेका छन्।

टाटा स्टिल र टाटा मोटर्सको सेयर मूल्य १० प्रतिशतभन्दा बढीले घटेको छ भने लार्सन एण्ड टुब्रो, एचसीएल टेक्नोलोजिज, अदानी पोर्ट्स, टेक महिन्द्रा, इन्फोसिस, टीसीएस, रिलायन्स इन्डस्ट्रीज र महिन्द्रा एण्ड महिन्द्रा जस्ता ठूला कम्पनीहरूको सेयर मूल्यमा पनि ठुलो गिरावट देखिएको छ।

यस गिरावटका कारण बीएसईमा सूचीबद्ध कम्पनीहरूको कुल बजार पूँजीकरण ३८३.१८ लाख करोड रुपैयाँले घट्दा लगानीकर्ताको सम्पत्ति २०.१६ लाख करोड रुपैयाँले घटेको छ।
एसियाली बजारहरूमा पनि व्यापक गिरावट देखिएको छ। हङकङको ह्याङसेङ परिसूचक ११ प्रतिशतभन्दा बढीले ओरालो लागेको छ भने जापानको निक्केई २२५ सूचकांक ७ प्रतिशतले घटेको छ। चीनको एसएसई कम्पोजिट र दक्षिण कोरियाको कोस्पी सूचकांक पनि क्रमशः ७ प्रतिशत र ५ प्रतिशतभन्दा बढीले गिरावटमा छन्।

अमेरिकी बजारमा समेत शुक्रबार नै ठूलो गिरावट देखिएको थियो। एसएण्डपी ५०० सूचकांक ५.९७ प्रतिशत, नास्दाक कम्पोजिट ५.८२ प्रतिशत र डाउ जोन्स ५.५० प्रतिशतले घटेका थिए।
तेलको मूल्य पनि घटेको छ। ब्रेन्ट क्रुडको मूल्य २.७६ प्रतिशतले घटेर ६३.७७ अमेरिकी डलर प्रतिब्यारेलमा झरेको छ।

साना र मझौला कम्पनीहरूको परिसूचकहरूमा पनि गम्भीर गिरावट देखिएको छ। बीएसई स्मल क्याप सूचकांक ६.६२ प्रतिशत र मिड क्याप सूचकांक ५.०१ प्रतिशतले घटेका छन्।
बीएसईका सबै क्षेत्रगत परिसूचकहरू रातोमा रहेका छन्। मेटल, इन्डस्ट्रियल्स, कमोडिटिज, सूचना प्रविधि, उपभोग्य वस्तु र प्रविधि समूहहरू सबैमा ठूलो गिरावट देखिएको छ।

समग्रमा हेर्दा, ट्रम्पको ट्यारिफ नीतिले सिर्जना गरेको विश्वव्यापी अस्थिरताले भारतीय सेयर बजारमा गहिरो चोट पुर्याएको छ।

श्रोत : एनडीटिभी