विश्व चर्चित व्यवसायिक रियालिटी शो शार्क ट्याङ्क नेपालको दोस्रो सिजन प्रसारण हुने भएको छ । पहिलो सिजनको सफलतापछि हिमालय टेलिभिजनले दोश्रो सिजनका लागि आवेदन खुला गरेको जानकारी दिएको हो ।
दोश्रो सिजनमा सहभागी भई लगानी जुटाउन चाहने उद्यमीहरूले अनलाइनमार्फत आवेदन दिन सक्नेछन् । आवेदन फाराममा व्यवसायको प्रकृति, संस्थापकहरूको विवरण, हालसम्मको लगानी, बिक्री अवस्था तथा अपेक्षित लगानी रकम लगायतका विवरण अनिवार्य रूपमा उल्लेख गर्नुपर्नेछ । साथै, आवेदक नेपाली नागरिक हुनुपर्ने, नेपालमा दर्ता भएको व्यवसाय सञ्चालनमा रहेको हुनुपर्ने छ ।
आवेदनपछि छनोटमा परेका व्यवसायलाई मात्रै कार्यक्रममा सहभागी गराइनेछ, जहाँ उद्यमीहरूले आफ्ना आइडिया “पिच” गर्दै लगानीकर्ता ‘शार्क’ सँग लगानीका लागि प्रस्ताव राख्नेछन् ।
दुई साताभित्र आवेदन दिने उद्यमीहरूको स्क्रिनिङ प्रक्रिया पूरा भएपछि बैशाखमा सुटिङ गर्ने तालिका रहेको हिमालय टेलिभिजनका कार्यकारी निर्देशक श्याम कडेलले जानकारी दिए ।
पहिलो सिजनमा करिब ८० उद्यमीका आइडिया प्रसारण भएका थिए, जसबाट करिब ३५ करोड रुपैयाँ बराबरको लगानी प्रतिबद्धता थियो ।
पहिलो सिजनमा हेमराज ढकालले १४ वटा व्यवसायमा १२ करोड, क्याबिनेट श्रेष्ठले १७ वटा व्यवसायमा ९.९ करोड, आनन्द बगरियाले ११ वटा व्यवसायमा ५.८ करोड, सौरभ ज्योतिले १५ वटा व्यवसायमा ५.५ करोड र ऋतु सिंह वैद्यले ८ वटा व्यवसायमा ४ करोड लगानी प्रतिबद्धता गरेका थिए।
यस सिजनमा करिब ५० करोड रुपैयाँ बराबरको लगानी जुटाउने लक्ष्य राखिएको आयोजकले जनाएको छ ।
प्रतिकृया