आज काठमाडौं महानगरपालिकाले दियो शोक बिदा

पञ्चायतकालका पूर्वउपप्रमुख तथा नेपाली कांग्रेसका नेता तीर्थराम डंगोलको निधनमा काठमाडौं महानगरपालिकाले आज शोक बिदा दिएको छ।

महानगरले सूचना जारी गर्दै अत्यावश्यक सेवा बाहेक महानगर र मातहतका सबै कार्यालयहरू बन्द रहने जनाएको छ।

पूर्वस्वास्थ्य राज्यमन्त्रीसमेत भइसकेका डंगोलको शुक्रबार राति ७७ वर्षको उमेरमा उपचारका क्रममा निधन भएको हो। उनी लामो समयदेखि प्रोष्टेट क्यान्सर र मिर्गौला सम्बन्धी समस्याको उपचार गराइरहेका थिए।

डंगोलको शनिबार नेवारी परम्पराअनुसार अन्त्येष्टि गरिएको छ। उनी विसं २०६२/६३ को जनआन्दोलनमा काठमाडौंमा सक्रिय नेतृत्वकर्ता थिए। साथै, डंगोल विसं २०५६ र २०६५ का प्रतिनिधिसभा चुनावमा सदस्य निर्वाचित भएका थिए।