४५%को गिरावटपछि आइपीओको तयारीमा रहेको शिवम् होल्डिङ्सको आम्दानीमा ९% को सुधार
इन्फोमेरिक्स क्रेडिट रेटिङ नेपाल लिमिटेडले हालै गरेको क्रेडिट रेटिङ पुनरावलोकनमा शिवम् होल्डिङ्स लिमिटेडको जारीकर्ता रेटिङ IRN BBB- (Is) कायम राखेको छ, जसले वित्तीय दायित्वहरूमा मध्यम सुरक्षा झल्काउँछ।
शिवम् होल्डिङ्सको प्रमुख लगानी होङ्शी शिवम् सिमेन्ट प्रालिमा रहेको छ। होङ्शी शिवम् सिमेन्टको सन्तोषजनक प्रदर्शनका कारण २०२४ मा कम्पनीको आम्दानी ९% ले वृद्धि भई रु. २३ करोड २० लाख पुगेको छ। २०२३ मा भने ४५% को गिरावटपछि यो आम्दानी रु. २१ करोड ३० लाख मा सीमित भएको थियो।
पछिल्लो वर्षहरूमा कम्पनीको ट्यान्जीबाल नेट वर्थ बढेको देखिएको छ। पछिल्लो ४ वर्षमा कम्पनीको ट्यान्जीबाल नेट वर्थ आर्थिक वर्ष २०२४ देखि क्रमश: ४ अर्ब ९० करोड, ४ अर्ब ५७ करोड, ४ अर्ब ३७ करोड र ३ अर्ब ८० करोड रहेको छ।
कम्पनीको प्रमुख सेयरधनी शिवम् सिमेन्ट लिमिटेडको ८५.०३ प्रतिशत, विनोद कुमार श्रेष्ठको ३.६३ प्रतिशत र दीपक कुमार झाको ३.२१% स्वामित्व रहेको छ। कम्पनीको ब्याज, कर, मूल्यह्रास र कटौती गर्नु अघि कमाइ (EBITDA) मार्जिन ९६.२८ प्रतिशत रहेको छ।
कम्पनीले जारी पुँजी रु. ५ अर्ब ८० करोड को २०% बराबर हुने १ करोड १६ लाख कित्ता साधारण सेयर सर्वसाधारणलाई निष्काशन गर्न नेपाल धितोपत्र बोर्डको स्वीकृति पर्खिरहेको छ। यसका लागि कम्पनीले सिद्धार्थ क्यापिटल लिमिटेडलाई शेयर निष्काशन तथा बिक्री प्रबन्धक नियुक्त गरिसकेको छ।
