काश्मीरमा भारत र पाकिस्तानबीच लगातार तेस्रो रात गोली हानाहान

पाकिस्तान र भारतबीचको सम्बन्ध दशकौंपछिको सबैभन्दा तनावपूर्ण अवस्थामा पुगेका बेला विवादित काश्मीर क्षेत्रमा लगातार तेस्रो रात दुवै देशका सेनाबीच गोली हानाहान भएको छ। अधिकारीहरूले आइतबार यो घटनाबारे जानकारी दिएका हुन्।

भारतले पाकिस्तानमाथि मुस्लिम बहुल काश्मीर क्षेत्रमा एक चौथाइ शताब्दीयताकै सबैभन्दा भीषण नागरिक आक्रमण गराउने बन्दुकधारीहरूलाई समर्थन गरेको आरोप लगाएको छ। भारतले उक्त घटनालाई ‘सीमापार आतंकवाद’सँग जोडेको छ।तर इस्लामाबादले आफ्नो संलग्नता अस्वीकार गर्दै भारतका आरोपहरूलाई ‘तुच्छ’ भनेको छ र भारतीय कुनै पनि कदमको कडा जवाफ दिने चेतावनी दिएको छ।

Ads

अप्रिल २२ मा भारतको पर्यटकीय क्षेत्र पहलगाममा २६ जना पुरुषको हत्या भएपछि भारतीय सुरक्षाबलहरूले फरार बन्दुकधारीहरूको खोजी अभियान तीव्र पारेका छन्। प्रहरीले फरार भएका मध्ये दुई जनालाई पाकिस्तानी नागरिकका रूपमा पहिचान गरेको जनाएको छ।भारतीय सेनाले आइतबार विवादित नियन्त्रण रेखा (एलओसी) मा पाकिस्तानतर्फबाट अनावश्यक साना हतियारहरूको गोलीबारी सुरु गरिएको र भारतीय सैनिकहरूले पनि प्रभावकारी जवाफ दिएको बताएको छ। पाकिस्तानले भने यसबारे कुनै औपचारिक पुष्टि गरेको छैन।

यस घटनापछि भारतले पाकिस्तानसँगको पानी बाँडफाँट सन्धि स्थगित गरेको छ। साथै, मुख्य भूमि सीमा क्रसिङ बन्द गर्ने, कूटनीतिक सम्बन्ध घटाउने र पाकिस्तानी नागरिकहरूका लागि भिसा रद्द गर्ने निर्णय गरेको छ।पाकिस्तानले पनि जवाफमा भारतीय कूटनीतिज्ञ र सैन्य सल्लाहकारहरूलाई निष्कासन गरेको छ। उसले सिख तीर्थयात्रीहरू बाहेक अरू भारतीय नागरिकहरूको भिसा रद्द गरेको र आफ्ना तर्फबाट पनि मुख्य सीमा क्रसिङ बन्द गरेको घोषणा गरेको छ।

स्थिति थप बिग्रन नदिन संयुक्त राष्ट्रसंघले दुबै पक्षलाई अधिकतम संयम अपनाउन आह्वान गरेको छ। संयुक्त राष्ट्रसंघले भारत र पाकिस्तानलाई आपसी अर्थपूर्ण संवादमार्फत समस्याको शान्तिपूर्ण समाधान खोज्न आग्रह गरेको छ।