सरकारले संघीय निजामती सेवा प्रवेशको उमेर सीमा घटाउने प्रस्ताव गरेको छ। प्रस्ताव अनुसार, पुरुषको अधिकतम उमेर ३२ वर्ष र महिलाको ३७ वर्षसम्म लोकसेवा आयोगको परीक्षा दिन पाउने व्यवस्था राखिएको छ, हालको प्रावधान अनुसार पुरुष ३५ र महिलाले ४० वर्षसम्म परीक्षा दिन सक्थे।
नेपाली कांग्रेसकी सचेतक सुशीला थिङले उमेर सीमा घटाउने निर्णयको आधार स्पष्ट नभएको र औसत उमेर बढिरहेको अवस्थामा यस्तो प्रस्ताव गर्नु उचित नहुने बताइन्। उनले वर्तमान प्रावधानलाई वैज्ञानिक र उपयुक्त बताइन्।
विधेयकमा १८ वर्षको उमेरमा राजपत्र अनंकित पदका लागि उम्मेदवार बन्न सक्ने र ३२ वर्षसम्म पुरुष तथा ३७ वर्षसम्म महिलाले सेवा प्रवेश गर्न पाउने व्यवस्था प्रस्ताव गरिएको छ। भूतपूर्व सैनिक र प्रहरीका लागि ४० वर्षसम्म उम्मेदवार बन्न सक्ने व्यवस्था पनि छ।
पेन्सनको प्रावधानका कारण पनि उमेर सीमा घटाउन नहुने थिङको धारणा छ, किनकि ४० वर्षको उमेरमा सेवा प्रवेश गर्ने महिला ५८ वर्षको उमेरमा सेवानिवृत्त हुँदा सेवा अवधि १८ वर्ष मात्र हुन्छ, जसले पेन्सन प्राप्त गर्न कठिनाई पुर्याउँछ।
प्रतिकृया