गुगलले आफ्नो नयाँ क्वान्टम चिप सार्वजनिक गरेको छ, जुन क्वान्टम कम्प्युटिङको क्षेत्रमा महत्त्वपूर्ण सफलता मानिएको छ। यस चिपलाई “माइन्डबोगलिङ” क्वान्टम कम्प्युटिङ चिपको रूपमा वर्णन गरिएको छ, जसले हालको सबैभन्दा तीव्र सुपरकम्प्युटरलाई १० सेप्टिलियन वर्ष लाग्ने काम पाँच मिनेटमै पूरा गर्न सक्षम बनाउँछ। यहाँ १० सेप्टिलियन वर्ष भनेको एकको पछाडि २५ शून्य जोडिएको अकल्पनीय ठूलो समय हो।
गुगलले यो नयाँ चिपलाई “विलो” नाम दिएको छ। यस चिपले ‘पार्टिकल फिजिक्स’को सिद्धान्तको आधारमा शक्तिशाली कम्प्युटर बनाउनको सम्भावना खोल्छ।तर, यो चिप हालका लागि एक ‘प्रयोगात्मक यन्त्र’ मात्र हो। विज्ञहरूका अनुसार, यस चिपबाट पूर्ण क्वान्टम कम्प्युटर बनाउनका लागि अझै वर्षौँको समय र अर्बौँ अमेरिकी डलरको लगानी आवश्यक पर्न सक्छ।
क्वान्टम कम्प्युटरहरू अहिलेका सामान्य कम्प्युटरहरूभन्दा निकै फरक तरिकामा काम गर्छन्। यी कम्प्युटरहरू कणको व्यवहार, अर्थात् क्वान्टम मेकानिक्सको सिद्धान्तको प्रयोग गरेर काम गर्छन्, जसले गर्दा उनीहरू जटिल समस्याहरूलाई पुराना कम्प्युटरहरूको तुलनामा धेरै छिटो र प्रभावकारी रूपमा समाधान गर्न सक्षम हुन्छन्।
क्वान्टम कम्प्युटिङको यो विकास नयाँ औषधिहरूको खोज, जटिल गणनात्मक समस्याहरूको समाधान र इन्क्रिप्सन तोड्न जस्ता कार्यहरूमा महत्वपूर्ण भूमिका खेल्न सक्ने अपेक्षा गरिएको छ। यसले गोपनीयता र सुरक्षा समस्याहरू पनि सिर्जना गर्न सक्छ, जुन भविष्यमा थप चिन्ता र अनुसन्धानको आवश्यकता पर्छ।
प्रतिकृया