ट्रम्पको कार्यकाल सुरु हुनु अघि नै विदेशी विद्यार्थीहरूलाई अमेरिका बोलाउँदै विश्वविद्यालयहरू, किन ?

जनवरी २० मा डोनाल्ड ट्रम्पले अमेरिकी राष्ट्रपतिको रूपमा पदभार ग्रहण गर्नुअघि नै अमेरिकी विश्वविद्यालयहरूले अन्तर्राष्ट्रिय विद्यार्थीहरूलाई यथाशीघ्र क्याम्पसमा फर्कन सल्लाह दिइरहेका छन्। ट्रम्पको सम्भावित आप्रवासन नीति र यात्रा प्रतिबन्धले विद्यार्थीहरूको शैक्षिक योजना प्रभावित हुन सक्ने डरले यस्तो सल्लाह दिइएको हो। ट्रम्पले आफ्नो कार्यकालको पहिलो दिनदेखि “सबैभन्दा ठूलो निर्वासन कार्यक्रम” सञ्चालन गर्ने र त्यसका लागि सैन्य सहयोगसमेत लिन सक्ने घोषणा गरेका छन्।

अघिल्लो कार्यकालमा ट्रम्पको कडा अध्यागमन नीतिले विद्यार्थीहरूलाई पारेको ठूलो असरको अनुभवले विश्वविद्यालयहरू अहिले नै सतर्क भएका छन्। युनिभर्सिटी अफ म्यासाचुसेट्स एमहर्स्टले जनवरी २० अघिनै अमेरिका फर्किन आग्रह गर्दै, ट्रम्पले २०१६ मा यात्रा प्रतिबन्ध लागू गर्दा पारेको प्रभावलाई आधार मानेर यो सल्लाह दिएको छ।

Ads

त्यस्तै, म्यासाचुसेट्स इन्स्टिच्युट अफ टेक्नोलोजी (MIT) ले पनि आफ्ना विद्यार्थीहरूलाई ट्रम्पको कार्यकाल सुरु भएलगत्तै भिसा प्रक्रिया र यात्रामा अवरोध आउन सक्ने चेतावनी दिएको छ। येल विश्वविद्यालयले भिसा र अध्यागमन नीतिसम्बन्धी विद्यार्थीहरूको चिन्ता समाधान गर्न वेबिनार आयोजना गरेको थियो।

ट्रम्पले पहिलो कार्यकालमा यात्रा प्रतिबन्ध लगाउनुका साथै विद्यार्थी भिसाको अवधि चार वर्षबाट दुई वर्षमा घटाउने प्रस्ताव राखेका थिए। यी नीतिहरूले विद्यार्थीहरूलाई एयरपोर्टमै रोक्ने वा फर्काइने अवस्था सिर्जना गरेको थियो।

ट्रम्पको अघिल्लो कार्यकालमा लगाइएका मुस्लिम बहुल देशहरूमा यात्रा प्रतिबन्ध, भिसाको अवधि घटाउने प्रस्ताव, र अध्यागमनमा कडाइले विद्यार्थीहरूको जीवन र शिक्षा प्रत्यक्ष रूपमा प्रभावित भएको थियो। अहिले पनि यस्तै परिस्थितिको पुनरावृत्ति हुनसक्ने भयले विश्वविद्यालयहरू सावधानी अपनाउन बाध्य भएका छन्।