प्रचण्डको दाबी: नेपालको नयाँ शक्ति भनेकै माओवादी केन्द्र हो

माओवादी केन्द्रका अध्यक्ष पुष्पकमल दाहाल प्रचण्डले नेपालमा नयाँ शक्ति भनेकै माओवादी केन्द्र भएको बताएका छन्। नेपालगन्जमा आयोजित पत्रकार  सम्मेलनमा  उनले नयाँ शक्ति बन्नका लागि राजनीतिक परिवर्तनको प्रक्रिया पूरा गरेर आएको हुनुपर्ने उल्लेख गर्दै आजका दिनमा माओवादी नै नयाँ शक्ति भएको बताए।

‘नेपालमा नयाँ शक्ति भनेकै माओवादी केन्द्र हो। आजको कालखण्डमा जनताको पक्षमा केही गर्ने र गर्दै आएको शक्ति नै नयाँ शक्ति हो। त्यो एजेन्डा माओवादीसँग मात्रै छ’ अध्यक्ष प्रचण्डले भने, ‘हामीले एजेन्डा उठाएनौं मात्रै, त्यसलाई आन्दोलनबाट स्थापित गरेर संविधानमा लिपिबद्ध गरेका छौं। संविधान कार्यान्वयन गरेर हामीले उठाएका राजनीतिक एजेन्डामार्फत जनताको जीवन बदल्न पनि फेरि माओवादी नै चाहिन्छ।’ उनले आफू नेतृत्वको सरकारले अघि सारेका सुशासन, सामाजिक न्याय र समृद्धिका एजेन्डा नै अब मुलुकलाई अघि बढाउन केन्द्रीय एजेन्डा हुने उल्लेख गर्दै उनले यसकै माध्यमबाट समाजवादमा पुग्न सकिने विश्वास दाबी गरे। अर्को एक प्रसंगमा अध्यक्ष प्रचण्डले पार्टीभित्र एउटा सिस्टम बसालेर अर्को भूमिकामा जाने सोच गरेको बताए।

 पार्टीको नेतृत्वबारे उनले आफूले लामो समयदेखि जिम्मेवारी सम्हाल्दै आए पनि अब नयाँ नेतृत्व तयार गर्न सिस्टम बसाउने सोचमा रहेको खुलासा गरे। उनले पार्टी फुट्ने हल्लालाई निराधार बताउँदै, माओवादी घटकहरूको एकता र समाजवादी मोर्चाको सुदृढीकरणमा ध्यान दिने योजना रहेको जानकारी दिए।

तेस्तै, उनले अहिले आफ्नो पार्टीको प्राथमिकतामा सरकार नभएको बताउँदै सरकारमा जानुभन्दा अब पार्टी निर्माण कार्यमा लागिरहेको उल्लेख गर्दै उनले आफू सरकार हुँदासमेत चारमहिने अभियान सञ्चालन गरी पार्टीलाई सुदृढीकरण गरेर लैजाने बताए। साथै, प्रचण्डले वर्तमान सरकार जनताको इच्छा विपरीत काम गरिरहेको आरोप लगाउँदै, आवश्यकता परेमा सडकमा उत्रिन सक्ने चेतावनी पनि दिए।