शिखर पावर डेभलपमेन्टको आईपीओ भर्ने आज अन्तिम दिन

शिखर पावर डेभलपमेन्ट लिमिटेडले निष्काशन गरेको आईपीओमा आवेदन दिने आज फागुन २६ गते मंगलबार अन्तिम दिन रहेको छ । कम्पनीले फागुन १७ गतेदेखि सर्वसाधारणलाई आईपीओ बिक्री खुला गरेको हो।

आईपीओ कम्तिमा ४ कार्य दिन खुला राख्नुपर्ने व्यवस्था छ । तर फागुन २० गतेदेखि २२ गतेसम्म चुनावको सार्वजनिक विदा परेको र फागुन २४ गते अन्तराष्ट्रिय महिला श्रमिक दिवसको सार्वजनिक विदा परेको थियो । सोहि कारण यो आईपीओमा आवेदन दिने म्याद थप गरेर आज फागुन २६ गतेसम्म कायम गरिएको हो।

कम्पनीले सर्वसाधारणलाई १८ लाख ४२ हजार ६ सय कित्ता (कर्मचारीलाई छुट्याईएको ४४ हजार ४ सय कित्ता बाहेक) सेयर निष्काशन गरेको छ।  आवेदन दिंदा न्युनतम १० कित्ता र अधिकतम १० हजार कित्ताको लागि आवेदन दिन सकिने छ। सेयर निष्काशनको लागि ग्लोबल आईएमई क्यापिटल बिक्री प्रबन्धक रहेको छ।

कम्पनीले यस अघि नै आयोजना प्रभावित स्थानीय र वैदेशिक रोजगारीमा रहेका नेपालीलाई सेयर निष्काशन गरि बाँडफाँड गरिसकेको छ ।  नेपाल धितोपत्र बोर्डले पुस १६ गते गते कम्पनीलाई आईपीओ निष्काशनको अनुमति दिएको हो ।