‘पूर्णबहादुरको सारंगी’का निर्माता भन्छन्, फिल्म हिट बनाउन १२ लाखको टिकट आफैंले किन्यौं

नेपाली बक्स अफिसमा कीर्तिमान राखेको चलचित्र ‘पूर्णबहादुरको सारंगी’ का निर्माता विनोद पौडेलले फिल्म हिट बनाउन १२ लाखको टिकट आफैंले किनेको खुलासा गरेका छन्। फिल्मको सुरुवाती प्रदर्शन कमजोर भएपछि दर्शक देखाउन उनले करिब १२ लाख रुपैयाँ बराबरको टिकट आफैंले किनिएको स्वीकार गरेका छन्।

उनले अहिले आफैले टिकट काट्नु पनि मार्केटिङ प्लान भएको बताएका छन् । फेसबुकमा लेख्दै उनले भनेका छन्, “इन्द्रेको बाउ चन्द्रेले फिल्म बनाए पनि २०/२५ लाखको त टिकट किन्नैपर्छ। १०/१२ लाखको त हामीले पनि किनेकै हो। अब टिकट काट्नु पनि मार्केटिङ प्लान हो।”

चलचित्र विकास बोर्डका अनुसार ‘पूर्णबहादुरको सारंगी’ ले ४६ करोड ८० लाख रुपैयाँ ग्रस कलेक्सन गर्दै नेपाली सिने इतिहासमा नयाँ रेकर्ड राखेको छ। तर सुरुवाती शोहरूमा दर्शकको उपस्थिति न्यून भएपछि आफैले लाखौँको टिकट किनेर हल हाउसफुल देखाउने रणनीति अपनाएका थिए। पछि भने बलियो माउथ पब्लिसिटीको कारण दर्शकको ठूलो ओइरो लागेको थियो।