मुद्रास्फीति घटेपनि, दैनिक उपभोग्य वस्तुको मूल्य बढ्यो

२०८१ असोजमा वार्षिक औसत उपभोक्ता मुद्रास्फीति ४.८२ प्रतिशतमा झरेको छ। अघिल्लो वर्ष यही अवधिमा यो दर ७.५० प्रतिशत थियो। खाद्य तथा पेय पदार्थ समूहको मुद्रास्फीति ७.१८ प्रतिशत रहेको छ भने गैर-खाद्य तथा सेवा समूहको मुद्रास्फीति ३.४९ प्रतिशतमा सीमित भएको छ।

अघिल्लो वर्ष यस अवधिमा यी समूहहरूको मुद्रास्फीति क्रमशः ८.४८ प्रतिशत र ६.८५ प्रतिशत थियो। तरकारी समूहको मूल्य २५.१५ प्रतिशतले वृद्धि भएको छ, जसले उपभोक्ताको खर्चलाई थप बोझिलो बनाएको छ। दाल तथा गेडागुडीको मूल्य १० प्रतिशतले बढेको छ भने खाद्य तथा खाद्यजन्य वस्तुहरूको मूल्य ९.५७ प्रतिशतले उकालो लागेको छ। यस्तै, घ्यू र तेलको मूल्य ४.९८ प्रतिशतले वृद्धि भएको देखिएको छ। केही वस्तुहरूको मूल्य भने घटेको छ। माछा तथा मासु उपसमूहको मूल्य १.१८ प्रतिशतले, मरमसलाको ०.७९ प्रतिशतले र चिनी तथा चिनीजन्य पदार्थको मूल्य ०.७८ प्रतिशतले घटेको राष्ट्र बैंकको तथ्यांकले देखाएको छ।

Ads

Ads

Ads

गैर-खाद्य तथा सेवा समूहमा पनि केही वस्तुहरूको मूल्यमा वृद्धि भएको छ। विविध वस्तु तथा सेवाहरूको मूल्य १०.४९ प्रतिशतले, मदिराजन्य पेय पदार्थको ६.३२ प्रतिशतले, कपडा तथा जुत्ताचप्पलको ६.१२ प्रतिशतले र घरायसी उपकरणको मूल्य ४.८८ प्रतिशतले वृद्धि भएको छ। यस तथ्यांकले मुद्रास्फीति केही घटे पनि उपभोक्ताका लागि दैनिक उपभोग्य वस्तुको मूल्य अझै उच्च रहेको देखाउँछ।