तीनकुने प्रदर्शनमा पक्राउ परेका रविन्द्र मिश्र र धवल शमशेरसहित २० जनालाई थप १५ दिन थुनामा राखिने

राष्ट्रिय प्रजातन्त्र पार्टीका उपाध्यक्ष रवीन्द्र मिश्र र महामन्त्री धवलशमशेर जबरा सहित २० जनालाई अदालतले थप १५ दिन हिरासतमा राख्न अनुमति दिएको छ। यी व्यक्तिहरू अहिले भद्रकालीस्थित जिल्ला प्रहरी परिसर काठमाडौँको हिरासतमा छन्। तीनकुनेमा चैत १५ मा भएको प्रदर्शनमा अवाञ्छित गतिविधि गरेको आरोपमा मिश्र र जबरा सोही दिन पक्राउ परेका थिए।

मंगलबार, काठमाडौँ जिल्ला अदालतका न्यायाधीश विष्णु प्रसाद उपाध्यायले उनीहरूलाई १५ दिन थुनामा राखेर अनुसन्धान गर्न अनुमति दिएका हुन्। प्रहरीले राज्यविरुद्धको कसुर र संगठित अपराध मुद्दामा अनुसन्धान गरिरहेको छ। यसअघि, मिश्र र जबरासहित २० जनाविरुद्ध क्रमशः ५ र ६ दिनको थुनामा म्याद थप गरिएको थियो।

तीनकुनेको प्रदर्शनमा अवाञ्छित गतिविधि गरेको आरोपमा पक्राउ परेका व्यक्तिहरू माथि आपराधिक उपद्रव र संगठित अपराधका मुद्दामा अनुसन्धान भइरहेको छ, जसमा ५३ जना थुनामा छन्।