आईपीओ भर्ने लगानीकर्तालाई नेप्सेको ‘सरप्राइज’: अब नेटवर्थ जतिसुकै होस्, ओपनिङ रेन्ज ३०० माथि नजाने!

नेपाल स्टक एक्सचेन्ज (नेप्से) ले आईपीओ निष्कासनपछि सूचीकरण हुने कम्पनीहरूको पहिलो कारोबारका लागि तोकिने ओपनिङ रेन्ज सम्बन्धी नियम परिवर्तन गरेको छ।

यसअघि नेप्सेले कम्पनीले विवरणपत्रमा उल्लेख गरेको प्रतिसेयर नेटवर्थको अधिकतम तीन गुणा मूल्यलाई आधार मानेर पहिलो कारोबारको ओपनिङ रेन्ज तोक्ने गर्दथ्यो। तर नयाँ व्यवस्थाअनुसार नेप्सेले पोजेटिभ नेटवर्थ भएका कम्पनीहरूको हकमा, नेटवर्थ जति भए पनि सेयरको अंकित मूल्य (फेस भ्यालु) लाई आधार मानी फेस भ्यालुको अधिकतम तीन गुणासम्मको ओपनिङ रेन्ज तोक्नेछ।

यस्तै नेगेटिभ नेटवर्थ भएका कम्पनीहरूको हकमा भने सोही नेटवर्थलाई आधार मानी तीन गुणासम्मको ओपनिङ रेन्ज तोकिने नेप्सेका प्रवक्ता मुराहरी पराजुलीले जानकारी दिएका छन्।

नयाँ व्यवस्थाअनुसार, शुक्रबार सूचीकरण भएका रिलायन्स स्पिनिङ मिल्स र सालपा विकास बैंकको पहिलो कारोबारका लागि नेप्सेले १००–३०० रुपैयाँको ओपनिङ रेन्ज तोकेको छ।