बैंकिङ प्रणालीमा अत्यधिक तरलता थुप्रिएपछि नेपाल राष्ट्र बैंक लगातार निक्षेप संकलन उपकरणमार्फत पैसा संकलन गरिरहेको छ। यही क्रममा, राष्ट्र बैंकले आज असार ८ गते फेरि ६० अर्ब रुपैयाँ बैंकिङ प्रणालीबाट तान्ने भएको छ। तरलता व्यवस्थापनका लागि दिउँसो ३ बजे निक्षेप संकलनको बोलकबोल प्रक्रिया सञ्चालन हुने राष्ट्र बैंकले जनाएको छ।
बैंक तथा वित्तीय संस्थाहरूले न्यूनतम १० करोड रुपैयाँ र अधिकतम ५ करोड रुपैयाँको गुणफलमा बोलकबोल गर्न सक्नेछन्, जसमा निःशेष भाग नजाने गरी प्रस्ताव पेश गर्नुपर्नेछ। बोलकबोल ब्याजदरमा आधारित हुनेछ भने बहुब्याजदरमा पनि प्रस्ताव दिन सकिनेछ। यस प्रक्रियामा ‘क’, ‘ख’, र ‘ग’ वर्गका बैंक तथा वित्तीय संस्थाहरू मात्र सहभागी हुन पाउने छन्।
४२ दिन अवधिको यस निक्षेप संकलनको साँवा तथा ब्याज साउन १८ गते भुक्तानी गरिनेछ। पछिल्लो समय कर्जाको माग कमजोर रहेको र लगानीका अवसर सीमित भइरहेका कारण बैंकिङ प्रणालीमा तरलता अत्यधिक बढेको छ। यसले गर्दा बैंक तथा वित्तीय संस्थाहरू करिब ३ प्रतिशत हाराहारीको ब्याजदरमै केन्द्रीय बैंकलाई पैसा दिन बाध्य भइरहेका छन्।
प्रतिकृया