केपी ओलीको ५ वर्षे प्रतिबद्धता, भ्रष्टाचार अन्त्य गर्नेदेखि आर्थिक विकासको ढोका खोल्नेसम्म

नेकपा एमालेका अध्यक्ष के.पी. शर्मा ओलीले आफ्नो निर्वाचन क्षेत्र झापा–५ केन्द्रित ४२ बुँदे प्रतिबद्धता पत्र सार्वजनिक गरेका छन्। मंगलबार एक समारोहबीच आसन्न प्रतिनिधिसभा निर्वाचनका लागि झापा नम्बर–५ केन्द्रित ४२ बुँदे प्रतिबद्धता पत्र सार्वजनिक गरेका हुन् ।

प्रतिबद्धता पत्रमा नेकपा एमालेले देशमा सुदृढ सुशासन, भ्रष्ट्राचार नियन्त्रण, राष्ट्र र राष्ट्रियताको संरक्षण, पूर्वाधार विकास लगायतका प्राथमिकताहरू समेटेको छ। ओलीले पार्टीको स्थापना कालदेखि कम्युनिस्ट आन्दोलनलाई मजबुत गर्दै आएको र विगतका उपलब्धिहरूलाई संरक्षण गर्दै अधुरा काम पूरा गर्ने प्रतिबद्धता व्यक्त गरे।

पत्रमा देशभरी सामाजिक सञ्जाल र विद्युतीय सञ्चारमा फैलिएका गलत सूचना तथा कृत्रिम बुद्धिमत्ता (AI) मार्फत हुने भ्रमप्रति पनि सचेत रहनुपर्ने उल्लेख छ। ओलीले भने, “हाम्रो नारा ‘सुखी नेपाली, समृद्ध नेपाल’ मात्र नाराले सीमित छैन; यो कार्यक्रम हो र यसको विकल्प छैन।”

अध्यक्ष ओलीले चुनावमा पार्टीका उम्मेदवारलाई विजय गराएर यस क्षेत्रको सुशासन, भौतिक पूर्वाधार, आर्थिक विकास र राष्ट्रको सुरक्षा सुनिश्चित गर्ने वचन पनि जनाए। साथै पार्टीले देशभित्रको राजनीतिक अस्थिरता र द्विविधापूर्ण परिस्थितिबाट उत्पन्न चुनौतीहरू सामना गर्दै जनताको भरोसा कायम राख्ने योजना अघि सारेको छ।

प्रतिबद्धता पत्र अनुसार, नेकपा एमालेले भ्रष्टाचारको शून्य सहनशीलता, आर्थिक पूर्वाधारको विकास, भूपरिवेष्ठित देशको व्यापार तथा कूटनीतिक सम्बन्ध सुदृढीकरणमा विशेष जोड दिने जनाएको छ।