दिव्यज्योति हाइड्रोपावर लिमिटेडले निर्माण गरिरहेको ५० मेगावाट क्षमताको ‘मर्स्याङ्दी बेसी जलविद्युत आयोजना’ को वित्तीय व्यवस्थापन सम्पन्न भएको छ। यस आयोजनाका लागि कम्पनी र विभिन्न बैंकहरूबीच बुधबार काठमाडौंस्थित होटल एभरेष्टमा आयोजित कार्यक्रममा ऋण सम्झौतामा हस्ताक्षर गरिएको हो।
कुल ११ अर्ब ३० करोड रुपैयाँ लागत अनुमान गरिएको आयोजनामा सिटिजन्स बैंक इन्टरनेशनल लिमिटेडको अगुवाइमा सह-वित्तीयकरणमार्फत ७ अर्ब ५० करोड रुपैयाँ ऋण लगानी गरिनेछ। बाँकी ३ अर्ब ८० करोड रुपैयाँ भने प्रवर्द्धक कम्पनीले स्वपुँजी (इक्विटी) मार्फत व्यवस्थापन गर्ने जनाएको छ।
गण्डकी प्रदेशको लमजुङ जिल्लाअन्तर्गत बेसीसहर नगरपालिका र मर्स्याङ्दी गाउँपालिका हुँदै बहने मर्स्याङ्दी नदीमा आयोजना निर्माण भइरहेको छ। कम्पनीका अनुसार निर्माण सम्पन्न गर्न ४ वर्षको समय तोकिए पनि कामलाई तीव्रता दिँदै आगामी ३० महिनाभित्रै आयोजना सम्पन्न गर्ने लक्ष्य राखिएको छ।
आयोजनाबाट उत्पादित विद्युत् करिब ८ किलोमिटर टाढा रहेको नेपाल विद्युत प्राधिकरणको १३२ केभी क्षमताको उदिपुर सब-स्टेशनमार्फत राष्ट्रिय प्रसारण लाइनमा जोडिनेछ।
कम्पनीले यसअघि २०७५ भदौ १० गते नेपाल विद्युत प्राधिकरणसँग विद्युत खरिद-बिक्री सम्झौता (PPA) गरिसकेको छ। साथै २०७४ असोज १ गते ऊर्जा मन्त्रालयअन्तर्गत विद्युत विकास विभागबाट उत्पादन अनुमति पत्र प्राप्त गरेको थियो। वित्तीय व्यवस्थापन सम्पन्न भएसँगै आयोजनाको निर्माण कार्यले थप गति लिने विश्वास गरिएको छ।
प्रतिकृया