Ads

नेपाल सरकारको सूचना तथा सञ्चार मन्त्रालयले सांस्कृतिक तथा राष्ट्रिय महत्त्वका क्षेत्रमा निर्माण हुने चलचित्रका लागि प्रोत्साहन अनुदान माग गरेको छ। मन्त्रालयले आर्थिक वर्ष २०८३/८४ को स्वीकृत कार्यक्रमअनुसार यथार्थपरक, मौलिक तथा जनचेतनामूलक चलचित्र निर्माणका लागि आवेदन आह्वान गरेको हो।

मन्त्रालयले कात्तिक १० गते प्रकाशित सूचना अनुसार चलचित्रको स्क्रिप्ट, प्रोडक्सन र पोस्ट प्रोडक्सन विधामा अनुदान उपलब्ध गराउनेछ। इच्छुक व्यक्ति तथा संस्थाले सूचना प्रकाशित भएको मितिले २१ दिनभित्र आवश्यक विवरण र कागजातसहित आवेदन पेस गर्नुपर्नेछ।

Ads

आवेदनमा चलचित्र वा स्क्रिप्टको नाम, विधा, कथाकार, पटकथाकार, भाषा, लेखक, निर्माता, निर्देशक, निर्माण संस्था, छायाँकार, कलाकार, अनुमानित लागत, निर्माण अवधि र कार्ययोजनालगायत विवरण खुलाउनुपर्नेछ।

त्यस्तै, सम्बन्धित व्यक्तिहरूको बायोडाटा, निर्माण संस्था दर्ता तथा स्थायी लेखा नम्बर (प्यान) प्रमाणपत्र, अघिल्लो आर्थिक वर्षसम्मको करचुक्ता प्रमाणपत्र र कम्पनी अद्यावधिक प्रमाणपत्र पनि पेस गर्नुपर्नेछ। स्क्रिप्ट लेखक र निर्माण पक्ष अलग भए उनीहरूबीच भएको सम्झौताको प्रमाणित प्रतिलिपिसमेत आवश्यक पर्नेछ।

आवेदनको ढाँचा तथा थप जानकारी मन्त्रालयको वेबसाइट moic.gov.np बाट प्राप्त गर्न सकिनेछ। मन्त्रालयले थप जानकारीका लागि ०१-४२००५७७ नम्बरमा सम्पर्क गर्न अनुरोध गरेको छ।