नेपाल राष्ट्र बैंकले सार्वजनिक गरेको तथ्यांकअनुसार चालु आर्थिक वर्ष २०८१/८२ को माघ मसान्तसम्म विदेशी मुद्रा सञ्चिति २३ खर्ब ६९ अर्ब ८ करोड रुपैयाँ पुगेको छ। गत असार मसान्तमा कुल सञ्चिति २० खर्ब ४१ अर्ब १० करोड रुपैयाँ रहेकोमा सात महिनाको अवधिमा १६.१ प्रतिशतले वृद्धि भएको देखिएको छ।
अमेरिकी डलरमा सञ्चितिको वृद्धिदर तुलनात्मक रूपमा केही कम देखिएको छ। असार मसान्तमा १५ अर्ब २७ करोड डलर रहेको विदेशी मुद्रा सञ्चिति माघ मसान्तसम्म आइपुग्दा १७ अर्ब ५ करोड डलर पुगेको छ, जसले ११.७ प्रतिशतको वृद्धि देखाउँछ। बैंक तथा वित्तीय संस्थाहरूमा रहेको विदेशी विनिमय सञ्चिति पनि उल्लेखनीय रूपमा बढेको छ। राष्ट्र बैंकसँगको सञ्चिति १३.९ प्रतिशतले वृद्धि भएर २१ खर्ब ५ अर्ब १४ करोड रुपैयाँ पुगेको छ, भने बैंक तथा वित्तीय संस्थाहरूमा रहेको सञ्चिति ३७.१ प्रतिशतले बढेर २ खर्ब ६३ अर्ब ९३ करोड रुपैयाँ पुगेको छ।गत असार मसान्तमा राष्ट्र बैंकसँग १८ खर्ब ४८ अर्ब ५५ करोड रुपैयाँ सञ्चिति थियो, जबकि बैंक तथा वित्तीय संस्थाहरूमा १ खर्ब ९२ अर्ब ५५ करोड रुपैयाँ मात्रै रहेको थियो।
नेपाल राष्ट्र बैंकका अनुसार मौज्दात विदेशी विनिमय सञ्चितिले १७.२ महिनासम्मको वस्तु आयात र १४.४ महिनासम्मको वस्तु तथा सेवा आयात धान्न पर्याप्त रहने अनुमान गरिएको छ। माघ मसान्तसम्मको कुल विदेशी विनिमय सञ्चितिको अनुपात कुल गार्हस्थ्य उत्पादनसँग ४१.५ प्रतिशत, कुल आयातसँग १२०.३ प्रतिशत, र विस्तृत मुद्राप्रदायसँग ३२.५ प्रतिशत पुगेको छ। असार मसान्तमा यी अनुपातहरू क्रमशः ३५.८ प्रतिशत, १०८.६ प्रतिशत, र २९.३ प्रतिशत रहेका थिए।नेपाल राष्ट्र बैंकले विदेशी विनिमय सञ्चितिमा भारतीय मुद्राको अंश २२ प्रतिशत रहेको जनाएको छ।
प्रतिकृया