नेपाली बक्स अफिसमा अहिले ‘आबाट आमा’ चलचित्रले निरन्तर अग्रता कायम राखेको छ। प्रदर्शनको ५२ औँ दिनसम्म आइपुग्दा पनि दर्शकको उच्च रोजाइमा रहेको यस चलचित्रले अन्य चलचित्रलाई पछाडि पार्दै स्पष्ट व्यापारिक अग्रता बनाएको देखिएको छ।
चलचित्र विकास बोर्डले सार्वजनिक गरेको आधिकारिक तथ्यांक अनुसार, चैत १ देखि ७ गतेसम्म देशभर प्रदर्शनमा रहेका चार चलचित्र—‘आबाट आमा’, ‘कुमारी’, ‘रमिताको पिरती’ र ‘लालिमा’—को कारोबार विवरण यस्तो छ: ‘आबाट आमा’ले हालसम्म ५,०३,११४ टिकट बिक्री गरी रु १३ करोड १० लाख ९२ हजार ७७५ आम्दानी गरेको छ, जुन अन्य तीन चलचित्रको संयुक्त आम्दानीभन्दा पनि धेरै गुणा बढी हो।
‘कुमारी’ले २०,८१७ टिकट बिक्री गरी रु ६६ लाख २५ हजार ४५१ आम्दानी गरेको छ भने ‘रमिताको पिरती’ले ९,९७५ टिकट बिक्री गरी रु ३० लाख ८४ हजार ८४३ कमाइ गरेको छ, र ‘लालिमा’ले २,०४० टिकट बिक्री गरी रु ५ लाख २९ हजार ७३८ आम्दानी गरेको देखिन्छ। चन्द्र पन्त निर्देशित ‘आबाट आमा’मा विपना थापा, प्रदीप रावत, पल शाह, सिम्रन पन्त र उषा उप्रेतीको अभिनय रहेको छ।
तथ्यांक अनुसार, प्रदर्शनको ५१ औँ दिन पार गरिसक्दा पनि आक्रामक कमाइ कायम राख्दै ‘आबाट आमा’ले अन्य सबै प्रतिस्पर्धी चलचित्रलाई फराकिलो अन्तरले पछि पार्दै दर्शकमाझ आफ्नो प्रभुत्व कायम गरेको छ। अन्य चलचित्रहरू भने दर्शक आकर्षित गर्न संघर्षरत देखिएका छन्।
प्रतिकृया