नर्सका माग सम्बोधन गर्न सरकारले बनायो समिति, पहिलो बैठक आजै बसेर काममा फर्काउने तयारी

सरकारले नर्सिङ स्वास्थ्यकर्मीहरूको पारिश्रमिकसम्बन्धी माग सम्बोधन गर्न समिति गठन गरेको छ। स्वास्थ्य मन्त्रालयका अतिरिक्त सचिव प्रा. डा. श्रीकृष्ण श्रेष्ठको संयोजकत्वमा १४ सदस्यीय समिति गठन गरिएको हो।देशभरका निजी अस्पताल र मेडिकल कलेजका नर्सहरूले उचित पारिश्रमिक नपाएको भन्दै आन्दोलन थालेपछि प्रधानमन्त्री सुशीला कार्कीले गत बिहीबार स्वास्थ्य मन्त्रालयका सचिवसहितको टोलीलाई बोलाएर तत्काल समाधान गर्न निर्देशन दिएकी थिइन्।

मन्त्रालयका सचिव डा. विकास देवकोटाका अनुसार समितिको पहिलो बैठक आजै बसेर आन्दोलनरत नर्सहरूलाई काममा फर्काउने वातावरण बनाउने प्रयास भइरहेको छ। उनले भने, “भोलिदेखि तिहार बिदा सुरु हुन्छ। धेरै जनशक्ति बिदामा हुने भएकाले कामको चाप हुन्छ। त्यसैले आजै सहमति गरी आन्दोलनरत पक्षलाई काममा फर्काउने कोसिसमा छौँ।”डा. देवकोटाका अनुसार समितिले एक हप्ताभित्र प्रारम्भिक प्रतिवेदन पेश गर्नुपर्नेछ। प्रतिवेदनमा तत्काल र दीर्घकालीन रुपमा समस्या समाधानका लागि गर्नुपर्ने कदमका सुझावहरू रहनेछन्।

समितिमा स्वास्थ्य मन्त्रालयको गुनासो सुनुवाइ एकाइ प्रमुख डा. अनुप बाँस्तोला, चिकित्सा शिक्षा आयोगका निर्देशक, स्वास्थ्य सेवा विभागको नर्सिङ तथा सामाजिक सुरक्षा महाशाखा प्रमुख, गृह, अर्थ, श्रम र शिक्षा मन्त्रालयका प्रतिनिधिहरू सदस्य रहेका छन्। साथै, नेपाल नर्सिङ परिषद्, नेपाल नर्सिङ संघ, नेपाल मेडिकल तथा डेन्टल कलेज एसोसिएसन, अफिन, र आन्दोलनरत नर्सका प्रतिनिधिहरू पनि समितिमा समावेश छन्। स्वास्थ्य मन्त्रालयको चिकित्सा सेवा, शिक्षा तथा अनुसन्धान शाखा प्रमुख सदस्य–सचिवका रूपमा तोकिएका छन्।नर्सहरूले सरकारले तोकेको आधारभूत तलब र सुविधा पाउनुपर्ने माग गरेका छन्। हाल सरकारले तोकेको न्यूनतम आधारभूत तलब रु ३४ हजार ७३० रहेको छ।