पानीको जारमा किरा भेटिएपछि केएम मिनरल वाटरलाई महानगरले तिरायो जरिवाना

ललितपुरको लगनखेलस्थित पशु सेवा तालिम केन्द्रमा पिउने पानीका लागि ल्याइएको जारमा कीरा फेला परेपछि उपत्यकामा वितरण हुँदै आएको जारको पानीको गुणस्तरप्रति प्रश्न उठेको छ।

उक्त घटना सार्वजनिक भएपछि ललितपुर महानगरपालिकाले पानी उत्पादन तथा वितरण गर्दै आएको केएम मिनरल वाटरलाई २५ हजार रुपैयाँ जरिवाना गरेको छ।

महानगरका नगर प्रहरीका अनुसार पिउन अयोग्य ठहरिएको जारको परीक्षणपछि कारबाही गरिएको हो।

जनस्वास्थ्यसँग प्रत्यक्ष सरोकार राख्ने विषयमा यस्तो लापरबाही गम्भीर रहेको भन्दै महानगरका अधिकारीहरूले सतर्कता अपनाउन आग्रह गरेका छन्।