श्रीजनशील लघुवित्तको साधारण सभा माघ २७ गते बस्ने, के-के छन् एजेन्डा ?
श्रीजनशील लघुवित्तको वार्षिक साधारण सभा माघ २७ गते बिहान ९ बजे होटल पावन मिथिला थाली, गोलबजार ६ मा बस्नेछ। सभामा आर्थिक वर्ष २०८०–८१ को नाफा नोक्सानमाथि छलफल हुनेछ भने आर्थिक वर्ष २०८१–८२ का लागि लेखापरीक्षक नियुक्ति र पारिश्रमिक निर्धारण गरिनेछ। कम्पनीले यसपटक लाभांश वितरणको प्रस्ताव नगरेकाले सेयरधनीले लाभांश पाउने छैनन्। साथै, अन्य वित्तीय संस्थासँग मर्जर वा एक्विजिशन गर्न तथा प्रबन्धपत्र र नियमावली संशोधन गर्न सञ्चालक समितिलाई अख्तियारी दिने प्रस्ताव पनि राखिनेछ। सभा प्रयोजनका लागि माघ १८ गते बुक क्लोज हुनेछ, जसअनुसार माघ १७ सम्मका सेयरधनीले मात्र सभामा भाग लिन पाउनेछन्।