Advertisement
Ads

जलवायु परिवर्तनको असर भोगिरहेको नेपालले निशर्त क्षतिपूर्ति पाउनुपर्छ : सांसद गौतम



राष्ट्रिय स्वतन्त्र पार्टी (रास्वपा) की सांसद सोबिता गौतमले संयुक्त राष्ट्रसङ्घीय फोरममा जलवायु परिवर्तन बाट नेपालमा परेको असर र पाउनुपर्ने क्षतिपूर्ति बारे आवाज उठाएकी छन् ।

राष्ट्रसङ्घीय एसिया प्यासिफिक आर्थिक र सामाजिक आयोग (यूएनइस्केप) ले थाइल्याण्डको राजधानी बैंक स्थित यूएन क्षेत्रीय कार्यालय (यूएन कन्फरेन्स सेन्टर) मा आयोजना गरेको दुई दिने फेमिनिष्ट फोरममा सहभागिता जनाउँदै सांसद गौतमले विकसित राष्ट्रले नेपाल जस्तो जलवायु सङ्कट सामना गरिरहेको राष्ट्रलाई हेर्न ढिला भएको धारणा राखिन ।


Advertisement

“विकसित राष्ट्रले औद्योगिक क्रान्ति, प्रविधिको विकास गरुन्, तर हामीजस्तो देशलाई पनि ख्याल गर्नुपर्छ । नेपालीहरुले कहिल्यै भोग नगरेको विलासिताको मूल्य चुकाउनुपरेको छ । उनीहरुको देशको जस्तो विकास हाम्रोमा छैन । तर पनि बाढीपहिरो, हिमपहिरो, हिमाल पग्लिने लगातार मारमा छौँ,” उनले भनिन। कार्यक्रममा सांसद गौतमले जलवायु सम्बन्धी कोषलाई महिला मैत्री बनाउनुपर्ने, महिलालाई पहुँच योग्य बनाउनुपर्ने, लैङ्गिक तथा यौनिक अल्पसङ्ख्यक समुदाय मैत्री बनाउनुपर्ने र अपाङ्गता मैत्री हुनुपर्नेमा जोड दिएकी थिईन ।

जलवायु परिवर्तन बाट नेपाली महिलाले भोग्नुपरेको असर र वित्तीय अनुदानको पहुँचको विषयमा आफ्नो धारणा राखेकी हुन् । सांसद गौतमले जलवायु परिवर्तनको प्रभाव सँग जोडेर नेपालको समस्या राखेकी थिईन । फोरममा दुबईमा कोप २८ मा स्थापना गरिएको ‘लस एण्ड ड्यामेज फण्ड’ (जुन विकसित देशहरुले जलवायु परिवर्तन बाट प्रभावित देशलाई क्षतिपूर्तिका लागि बनाइएको हो) कोषलाई कसरी व्यावहारिक कार्यान्वयन गर्न सकिन्छ, महिलालाई कसरी सम्बोधन गर्ने र यो कतिको महत्वपूर्ण छ भन्ने कोणबाट छलफल भएको सांसद गौतमले जानकारी गराइन ।

उक्त फोरममा अल्पविकसित अथवा विकासशील मुलुकका महिलालाई राष्ट्रसङ्घीय सहायताको पहुँचमा कसरी पुर्‍याउने विषयमा छलफल भएको थियो । कार्यक्रममा नेपालबाट राष्ट्र बैंकका प्रतिनिधि, गैरसरकारी संस्थाका पदाधिकारी तथा राष्ट्रिय योजना आयोगका कर्मचारी सहभागी थिए ।

#bajarkochirfar

यो पढेपछि तपाईलाई कस्तो लाग्यो ?




प्रतिकृया


सम्बन्धित खबर